Çăмăл атлетика ĕлĕкренпех халăх юратакан спорт енĕ шутланать. Ахальтен мар пулĕ ăна Европăри çĕршывсенче "спорт королеви" теççĕ. Пирĕн республикăра та çăмăл атлетика лайăх аталанать. Майăн 14-15-мĕшĕсенче Шупашкарти "Олимпийский" стадионта çăмăл атлетика енĕпе иртнĕ республика чемпионатĕнче 28 хулапа районти тĕрлĕ ỹсĕмри 800 спортсмен вăй виçнĕ. Çав кунсенчех республикăри 15-20 çулсенчи яш-семпе хĕрсем тата юниорсем те тупăшнă. Çăмăл атлетикăн тĕрлĕ енĕсемпе ăмăртнă çĕре пирĕн район спортсменĕсем те хутшăннă. Хĕрлĕ Чутай шкулĕн-че 10-мĕш кадет класĕнче тата 11-мĕш класра вĕренекенсем чи вăйлă командăсем хушшинче çухалса кайман. Вĕсем хăйсене уйрăмах эстафетăсенче лайăх енчен кăтартса пама пултарнă. 4х100 эстафетăра Хĕрлĕ Чутай шкулĕн команди 4-мĕш вырăн йышăннă. 4х400 эстафетăра вара, район историйĕнче пĕрремĕш хут, хĕрлĕчутайсем 2-мĕш вырăна тухма пултарнă. Команда йышне кĕнĕ Константин Секайкин, Кирилл Андрианов, Юрий Степанов тата Алексей Дадюков патăрьелсене пĕр çеккунт кăна выляса янă, Шупашкарти командăна вара виççĕмĕш вырăна хăварнă. "Хастар" ФСК-н çăмăл атлетика енĕпе ĕçлекен тренерĕ Эдуард Романов патĕнче ăсталăхне туптакан ачасем республика шайĕнче пысăк çитĕнỹ тума пултарни чунтанах савăнтарать. А.ТИМОФЕЕВА.

Источник: "Пирěн пурнăç"