Июлĕн 4-мĕшĕнче Хĕрлĕ Чутай шкулĕн салтак çулне çитмен 10 çамрăкĕ тата вĕсен тренерĕ Эдуард Романов педагог Краснодар хулинче иртнĕ ăмăртусенчен таврăнчĕç. Тăван шкул патĕнче вĕсене çывăх çыннисем, вĕрентекенсем, юлташĕсем кĕтсе илчĕç.

Июнĕн 26-мĕшĕнчен пуçласа июлĕн 2-мĕшĕччен пынă Раççей шайĕнчи Спартакиадăна пурĕ çĕр-шыври 54 команда хутшăннă. 16-17 çулхи яшсем хăйсен çар хатĕрленĕвне, автомат сỹтсе пухма пĕлнине кăтартса панă, пневматикăллă винтовкăран пенĕ, стройпа утнă, сикнĕ, чупнă, турник çинче туртăннă... Пĕр сăмахпа каласан, хăйсем çĕршывăн хỹтĕлевçисем пулма хатĕррине кăтартса панă.

Çакăн пек пысăк шайри сумлă ăмăртусенче пирĕн район команди иккĕмĕш вырăн йышăнма пултарни çĕнтерỹпе танах. Ăмăртусенчен тухса кайиччен шантарнă пекех, хăйсенчен мĕн килнине пĕтĕмпех тунă вĕсем. Пĕр шкулти икĕ класра вĕренекенсенчен пухнă команда тăван шкул, район, республика чысне çĕршыв шайĕнче тивĕçлипех хỹтĕленĕ.

А.КАРПОВА.